ಎಲ್ಲರು ಮಾಡುವುದು ಹೊಟ್ಟೆಗಾಗಿ

-ಶ್ರೀ ಪುರಂದರದಾಸರು

ಎಲ್ಲರು ಮಾಡುವುದು ಹೊಟ್ಟೆಗಾಗಿ |
ಗೇಣು ಬಟ್ಟೆಗಾಗಿ || ಪ ||
ಸಿರಿ | ವಲ್ಲಭನ ಭಜಿಸುವುದು ಮುಕ್ತಿಗಾಗಿ || ಅ ಪ ||

ಪಲ್ಲಕ್ಕಿಯ ಹೊರುವುದು ಹೊಟ್ಟೆಗಾಗಿ ದೊಡ್ಡ |
ಮಲ್ಲರೊಡನಾಡುವುದು ಹೊಟ್ಟೆಗಾಗಿ ||

ಸುಳ್ಳಾಗಿ ಪೊಗಳುವುದು ಹೊಟ್ಟೆಗಾಗಿ |
ಸಿರಿ ವಲ್ಲಭನ ಧ್ಯಾನವು ಮುಕ್ತಿಗಾಗಿ || ೧ ||

ದೊರೆತನ ಮಾಡುವುದು ಹೊಟ್ಟೆಗಾಗಿ |
ಕರಿ | ತುರಗವೇರುವುದು ಹೊಟ್ಟೆಗಾಗಿ ||

ದುರಿತವ ಮಾಡುವುದು ಹೊಟ್ಟೆಗಾಗಿ |
ಸಿರಿ | ಹರಿಯ ಭಜಿಸುವುದು ಮುಕ್ತಿಗಾಗಿ || ೨ ||

ಬೆಟ್ಟವ ಹೊರುವುದು ಹೊಟ್ಟೆಗಾಗಿ |
ಗಟ್ಯಾಗಿ ಕೂಗುವುದು ಹೊಟ್ಟೆಗಾಗಿ ||

ದಿಟ್ಟವಾಗಿ ನಮ್ಮ ಶ್ರೀ ಪುರಂದರ |
ವಿಠಲನ ಧ್ಯಾನವು ಮುಕ್ತಿಗಾಗಿ || ೩ ||

Download – Kannada