ಧರ್ಮಕ್ಕೆ ಕೈ ಬಾರದೀ ಕಾಲ

-ಶ್ರೀ ಪುರಂದರದಾಸರು

ಧರ್ಮಕ್ಕೆ ಕೈ ಬಾರದೀ ಕಾಲ |
ಪಾಪ ಕರ್ಮಕ್ಕೆ ಮನಸೋಲೋದೀ ಕಲಿ ಕಾಲ || ಪ ||

ದಂಡದ್ರೋಹಕೆ ಉಂಟು | ಪುಂಡು ಪೋಕರಿಗುಂಟು |
ಹೆಂಡತಿ ಮಕ್ಕಳಿಗಿಲ್ಲವೀ ಕಾಲ ||

ದಿಂಡೇರಿಗುಂಟು | ಜಗಭಂಡರಿಗುಂಟು |
ಅಂಡಲೆವರಿಗಿಲ್ಲವೀ ಕಾಲ || ೧ ||

ಮತ್ತೆ ಸುಳ್ಳರಿಗುಂಟು | ನಿತ್ಯ ಹಾದರಕುಂಟು |
ಉತ್ತಮರಿಗಿಲ್ಲವೀ ಕಾಲ ||

ತೊತ್ತೇರಿಗುಂಟು | ತಾಟಕಿಗುಂಟು |
ಹೆತ್ತತಾಯಿಗಿಲ್ಲವೀ ಕಾಲ || ೨ ||

ಹುಸಿ ದಿಟವಾಯಿತು | ರಸ ಕಸವಾಯಿತು |
ಸೊಸೆ ಅತ್ತೆಯ ದಂಡಿಸೋದೀ ಕಾಲ ||

ಬಿಸಜಾಕ್ಷ ಪುರಂದರವಿಠಲನ ಮನದಲ್ಲಿ |
ಸ್ತುತಿಸುವವರಿಗಿಲ್ಲವೀ ಕಾಲ || ೩ ||